Ministri i Mbrojtjes, Ejup Maqedonci po merr pjesë në Forumin ‘Defense24” në Varshavë, ku është takuar sot me homologun e tij polak, Wadysław Kosiniak- Kamysz.

Maqedonci e njoftoi Kamuszin për 48 bazat ushtarake serbe të vendosura pranë kufirit me Kosovën teksa e informoi edhe rreth situatës së sigurisë në vend dhe rajon, përcjell Arbresh.info.

“Ministrin Kamysz e informova rreth situatës së sigurisë në vend dhe rajon, gjersa shpreha dhe shqetësimin tim për militarizimin e Serbisë dhe 48 bazat e ushtrisë dhe gjandarmërisë serbe të vendosura përgjatë vijës kufitare me Kosovën, e gjithashtu dyshimin e bazuar me rastin e sulmit në Banjskë që grupet terroriste po mbështeten nga strukturat e sigurisë të shtetit të Serbisë me qëllim për të shkaktuar destabilizimin e Kosovës dhe Ballkanit në përgjithësi”, ka shkruar Maqedonci në llogarinë e tij në Facebook.

Maqedonci dhe Kamysz u dakorduan për bashkëpunim në fushën e mbrojtës mes dy vendeve.

“Duke qenë të vetëdijshëm se lufta në Ukrainë kërcënon sigurinë e përgjithshme të Evropës, theksova që Kosova do të vazhdoj të ofroj mbështetjen e pakursyer për Ukrainën brenda kapaciteteve tona shtetërore. U dakorduam që është tejet e rëndësishme të vendosim bashkëpunim në fushën e mbrojtjes ndërmjet Kosovës dhe Polonisë”, u shpreh Maqedonci./Arbresh.info